Na porta chiusa!

Era lu jornu ri lu ‘Venniri Santu’, e comu sempri sugnu solita fari,
ddà matina,li sapulcri mi ivu a firriari,e a lu stessu tempu mi vosi
cunfissari,
pi farimi lu pricettu pasquali.
Già ntà ru chesi, lu santu sapulcru avia visitatu,
e m’avviavu versu la terza chesa, pi concludiri lu giru c’avia prugrammatu.
Ri pocu era menziornu passatu quannu, arrivata ravanti la chesa,
truvai la porta già chiusa! Granni fu la mè dilusioni!
Ormai era tardu, nun c’era cchiù nenti ri fari!
Turnai nnarreri nnè mè passi, ma ad un trattu un fattu successi,
e “qualcunu” vosi ca iu ddà ci fussi!
Un picciriddu ri quasi cinc’anni, iucava cu du palummi ravanti a na machina
pustiggiata,
so matri lu chiamau ri l’avutru latu ri la strata.
Iddu, ‘ncuscenti, subbitu si partiu, ma un muturi a gran vilucità stava
p’arrivari,
e fu ddòcu, ca ‘ntirvinni iu!
‘Ntò lampu, tutt’ora nun sacciu comu,fui ‘ncoddu o picciriddu,l’affirrai p’un
brazzu
e satai nnarreri, comu sata un griddu!
Tutta trimanti, mi lu misi ‘mbrazza e lu vasai, iddu, scantatu, forsi pinzò:
– ma chista com’è pazza? Cu l’ha vistu mai? –
E subbitu dopu, un pinzeru mi culpiu la menti !
” Ah, Signuri ! Bona fu la scusa, ri farimi truvari la porta ri la chesa
chiusa !