Manciativillu Tuttu

Si natura negat, facit indignatio versum, qualemcumque potest.
(Decimo Giulio Giovenale)

Manciativillu tuttu stu munnu
ca pi vuatri è fattu, bellu tunnu,
sanzeru, si spacca cu ll’ugnia stu munnu!Manciativillu tuttu, bastardi ‘nmbrugghiuna ,
vuliti fari sciavuru ma siti lurduna,
parrina, dottura, sindachi e presidenti,
vuatri cu l’oru ‘nte renti e
a cruna ‘nte manu,
pigghiatili pi fissa a tutti sti puvureddi
ca ci abbasta ca ci dati un nenti,
e v’alliffianu comu fannu i cagnuleddi.
Puvureddi daveru su sti puvureddi
ca un sannu mai a cosa giusta e a cosa sbagghiata,
sannu sulu ca l’acqua vugghi, e s’avi a mettiri a pignata!

Manciativillu tuttu, a picca a picca,
tantu u vermi puru poi si licca
ca carni vostra.
E io riru di sta giostra e
d’i vostri panzi a tammurinu,
riru d’i vasateddi chi vi rati ogni matinu
e di l’occhi vostri favusi
quannu ammucciuni vu cuntati,
quannu, ca merda cavusi cavusi,
vu cuntati
quantu mischineddi aviti ‘nculati.

.

Pigghiativillu tuttu stu munnu ca è latrina,
stu munnu fattu pi chiddi ca comu a vuatri su sulu sintina,

pigghiativillu tuttu stu munnu ca tantu è sulu un scherzettu
fattu apposta pi vuatri ca ccà ci natati comu i strunzi ‘nto gabinettu!

.

15/12/2007
di Domenico Passantino