Poesia: A furriata ri torci

di Angolo Poesie*

La genti chi saffudda
nta la chiazza,
davanti a chiesa
sfilanu li torci,
li retini cu setti muli nfila
comu i setti sacramenti,
bardati a festa,
chi visazzi
chini ri furmentu
da offriri
a lu Signuri.

Cu guida a retina
tirannu li muli
si ferma
davanti o purtuni
facennusi la cruci
addinucchiuni.

U capu retina
siguennu u ritu anticu
preia assittatu
ncapu u mulu :
Patri di li grazi
la festa e’ pi tia
recita un Patri Nostru
e n’Ave Maria.

Sona la banna,
furria a retina
ittannu cunfetti
ncapu a genti
chi si diverti,
granni e picciriddi
cu li vrazza arzati,
furria, furria ,
tutti cuntenti
felici grirannu
i cuppitedda acchiappannu,
puru li fimmini
ca ni barcuna stannu .

Finisci tuttu
s’addumanu li torci
ri scira e peri du
Crucifissu ncapu a vara.

*Vito La Paglia